Canti della settimana santa - Dal sito Tarsiadialetto

Trova significato
Vai ai contenuti

Menu principale:

'Nzorfa

Canti della settimana santa

Oh mamma Maria, cch' cori facijsi
quannu dù figli tuu ti stagliavisi
Ca mijnz'i Giudei u canuscijsi
Ci jisi apprijssi e nun l'abbannunasti.
Oh mamma, mamma, se mi vuoi vedere
Vijini ccù mmia aru montu Calvariu
Cà ddhrà mi truuvi tuttu sfracillatu
E di li chiaghi mij spricuratinni.
Oh mamma, mamma, mò cà sì vinuta
Mancu nà guccia i gacqua mà purtatu
Ohi figliu, tu ca l'acqua la criasti
Mò acitu e fele 'un ti po' mancari
Ohi mamma, i piccaturi m'ani misi in crucia
Ppì piccati ca fan'aru spissu
E m'ani fatti n'ata crucia nova
E i nuuvi mi ci vuuni crucifissu.
Ohi figliu, tant'abbisi u nnì mannari
Sinò i piccaturi i pirdimi,
Cà ven'u jiurnu ca lori si péntini
E chiru jiurnu nua li ricuglimi.
Ohi mamma, nun mi sunari i campani
Nemmeno 'un ciangi e vattinni.
Ohi figliu d'oru, 'unnu puuzu fari
Di ti lassari sullu e minni jiri.
Avìa nu figliu i trentatria anni
Prima curuna d'a testa mia
E mò u vija a na crucia d'affanni
Gigliu i luucchi mij viinitinni.
Ohi crucia tanta tisa, vasciati nù pocu
Quantu vas'i pedi aru figliu miu.
Maria, nummi puuzu cchiù vasciari,
Cà Giuda u tradituru m'à saputu ben chiuvari.

( Canto di passione, cantato il Venerdì Santo).
E Maria sa mmisa lu mantu e sa mmisa a caminà
Pà via asconda a Giuda e ci s'ammisa a raggiunà:
Ohi Giuda, tradituru, tradimiendu m'à fatt'a mmia
T'à vinnutu u figgliuulu miu ppì trenta dinari.
Si vinijsi adduv'a mmia, cchiù di trenta ti ni dunava
E si trenta 'un ci bastavanu, mi vinnìa lu vestimientu,
Vestimientu di valuri e di marmu intagliatu
Mò di ghinda cè u figliu e ti sia raccummannatu.
Scuru u cijlu, scura a terra,
scura Maria cà ghè a cchiù bella
Scuru u cijlu, scura la luna,
u figli'i Maria mò s'incuruna.
Ohi Madonna di lu chiantu, chi ti serva stù caminu
Vostru figli ghè a na catina, cruci 'ncuuddhru 'un po' purtari
E u sangu va a lavina, un ci su midicini ca u puutini sanari
E chiss'anima si pirdissa ppì nun pati stu duluri
Ca s'avia nu rifugiu 'nda na grutta nivura e scura.

Quanta ghè beddhra a crucia lavurata
A crucia santa adduvi cè muurtu Ddiu,
I nu latu ci stà l'Incoronata
I n'atu latu cè a chiuveria.
U piccaturu ch'era di latu ci dicìa:
Gisù mmiu chi ti ha offeso?
M'ài offeso tu, piccaturu 'ngratu,
Ppi piccati tua 'ncrucia m'ani misi”.
Diddhru ti chiama e tu, chi fa, 'un sijnti?
A chini à muustri tanta tirannia?
Dunimi, Gesù, i st'acqua viva,
quantu ti nnà dat'a Samaritana.

 
Torna ai contenuti | Torna al menu